La biblioteko funkcias en du lokoj. La “postkulisaj”
laboroj estas farataj en la hejmo de la
bibliotekisto; tie ekzistas la ĉefekzemplero de
la katalogo, kaj tie estas redaktataj tiuj ĉi paĝoj.
Pli interesa por vi estas la parto vizitebla de
la biblioteko. Ĝi situas en du ĉambroj en kaj
apud la Esperanto-Domo ĉe la kolegio Wedgwood
en Barlaston, apud Stoke-on-Trent. Pri la
ĝenerala aranĝo de la Esperanto-Domo vi
trovos informojn en la paĝoj de EAB.
La Ĉambro Butler estas la ĉefa ĉambro de la
biblioteko; ĝi konsistigas proksimume duonon
de la Esperanto-Domo. Tie vi trovos la ĝeneralan
libro-kolekton, la periodaĵojn, la komputilon kaj
la katalogon.
La dua ĉambro, Ĉambro Houghton (pron. Haŭt’n)
staras aliflanke de korteto. Tie vi trovos la ĝeneralan
arkivon, la fotoarkivon, kaj la pruntokolekton.
Tiu ĉambro estas ankaŭ konvene aranĝita por trankvila studado.
|
Krom per aŭto (kiun eblas lasi antaŭ la biblioteko) vi povas alveturi per trajno aŭ per aŭtobuso
La aŭtobuso n-ro 350, se vi ĝentile tion petos al la ŝoforo, povas vin demeti tuj antaŭ la Kolegio.
 |
Detalo de la vilaĝo. NB la domo indikita kiel “the Library” estas la vilaĝa biblioteko. La biblioteko Butler, kaj la Esperanto-Domo, troviĝas kie indikitas “The College”
Kvankam oni ne formale anoncis tion, la fervoja stacio en Barlaston ŝajnas definitive fermita. Pri aŭtobusaj servoj vidu sube.
Stoke kaj Stafford havas ligojn per trajnoj kaj ekspresaj aŭtobusoj ne nur kun Londono kaj aliaj urbegoj sed ankaŭ kun multaj disaj lokoj de Skotlando ĝis Kornvalo. Do lasu hejme la aŭton, vi ne bezonas ĝin!
Aŭtobusoj inter Stoke, Barlaston, kaj Stafford
Detalajn horojn de la aŭtobusoj vi povas vidi en aparta paĝo.
Resume, inter Stoke kaj Barlaston iras la aŭtobuslinioj X1 kaj 350. Ili ambaŭ iras meze unu fojon en horo; sed en sabato la linio X1 iras nur ĉiun duan horon.
Rekte inter Stafford kaj Barlaston iras nur la linio X1, same unu fojon en horo, ĉiun duan horon en sabato. Eblas ankaŭ, kaj utilas precipe en sabato, iri de Stafford al Stone per aŭtobuso 101, kaj de tie veni al Barlaston per aŭtobuso 350.
Ĉiuj linioj ekas de antaŭ la koncerna stacidomo. Eblas aĉeti fervojan bileton ĝis Barlaston kaj uzi ĝin en la aŭtobuso X1; tio tamen ne validas pri la aŭtobusoj 350 kaj 101, kiuj estas aparte, kaj unuope, pagendaj.
En festotagoj la aŭtobusoj funkcias kiel en sabato. En dimanĉo ne estas servo al Barlaston
Notu ankaŭ, ke, se vi venos ne portante pezaĵojn, povas interesi la aŭtobuso n-ro 101, kiu iras inter Stoke kaj Stafford, trapasante la vilaĝon Tittensor kaj urbeton Stone, kiuj tre proksimas al Barlaston. Tiu aŭtobuso funkcias sufiĉe ofte; ordinare tri fojojn en horo, vespere kaj dimanĉe unu fojon en horo.
La aŭtobuso 101 povas esti oportuna se oni venas en vespero aŭ en dimanĉo, kiam aliaj aŭtobusoj ne funkcias.
Lasta aktualigo 2007.08.17